N DI O L AUTER CASSÙ O CAJÙ
N di o l auter canche saré trëi metri sota tiera,
“Mpue de zes” coche dijëssa Roland Verra,
n pesc cun me nstës, zënza moral y zënza maniera
aspiterei che i iermes scumënce si party underground – sottoterra.
Ma daldò saral danz da udëi, vo ntant priede, fajëdme l plajëi
coche i spartirà danter i lëufs y aniei.
I dij che cassù dëssel vester n bel tlima, la skyline ne dëssa ënghe nia vester
tan malët,
y n possa sun la nibla crì ora: danter arpa o vidula cun archët.
Cajù ala bassa scentant,
dëssa vester da cësa truep artisć, autoriteies y poec da snait
Bukowski, vel’ papa y Oscar Wilde.
Ma l dëssa vester ciaut cajù, cun l frëit che patësce messëssi pu vester cuntënt,
y danter ch’la gran flames, diji, prati uni di n tel gran armënt.
Ehe, maië melsane cajù, pu ie pu nfat
Degun pudëi ne à plu l colesterin, canche te ies bele de plat.
Ah y cassù… capirai bën nce ladin y ne rujenerà nia mé latin,
y pona uei udëi "dal vif" chël che trasfurmea l’ega te vin.
Da alauta ju, danz che n ëssa na bela ududa
ma cun duta la regules clericales, iel bën na sperduda
Ie miene, ne ulësse de un n cont nia vester –cajù- danter i dannei
sambën che l fossa nce bel –cassù- danter i sanc unerei y respetei,
ma me lascëis’a pona da mi nibla cialé ju cun la rola a na tel blòta miss…
ah, pënse che ruvé –tamezite- fossa n bon compromiss.
Adum a vo cun vosta ntenzions,
Ve ei pu ala fin di conc gën te vosta mperfezion
Y sce iló –tamezite- ne rujeneron nia massa da cervelon,
uni ann d’agost scuteron su i Sonoton
mpue de John Steinbeck liejeron
y datrain do cëina na zigara se fumeron
…. pona povester assé che ciafieron.
L nfinit dl ciel, na mesura massa grant per me
Do col ju… ne pënse nia de me l merité
Ma dit nscila, de cuer y cun duta mi ana.
Te purgatuere, marati, me n stajëssi na cana.