IE CRËIE AL INTERNET
Te n mond ulache ie unida slavateda la rejon,
da n Tsunami de nfurmazion
ulache se mesceidà urità y cuntradizion
y te ne posses nianca avëi crëta a cie che te crësc te ti verzon.
Urmei nianca plu dala perdiches da cannsla ju se temon
Danter 150 canai menon, nfraidian dan televijion
Frases dlacedes ite muferlon, chi che brieia plu adaut
chël à rejon.
Ie ne raide nia giut ntëur la pulënt y l dije bel bret
Dalonc ie i tëmps de Craxi a Hammamet
Canche fova saurì desfrenzië l drët dal stlet
Canche dan seniëur digan oven mo respet
streflan do a pruzescions, ora et labora, coche n snech.
Ie, muesse l dì, zape bele dai ani nia plu ite te na bibliotech
ma mpo mëini la musa, é da dì zeche,
ajache ie crëie a chël che dij l internet.
L ie na marueia dut chël che n abina
na statua de Santa Lisabetta cun l pëtler, fata tla Cina,
nfurmazions co scrì adum na rima bel scëmpla y fina
y na chat per ti fé la beles a chëles da Santa Cristina.
Sce savessais, dutes per debant me dal la nfurmazion
Co fejel pa a tré inant l internet ne muriral pa da fam
Miec che cialé l nutizer cun dut si retlam
Ie crëie a chël che me conta l internet, dloti si nutizies dut nghëus
Bill Gates che uel scinché n dollar a uniun de nëus
Y che l uele de palma ie tan priculëus
Sciot che deguni dant ne l dijova
Uel de palma, ne savovi nianca cie cavolo che l fova
Ie crëie mpo al internet, sce l ie scrit saral bën vëira
Cie bel a crì a nutizies mo tert dassëira
I te scinca n Iphone 7, i ne à fat de massa, l tleca n click
O “Uessa te mé n n’ena cun ch’sc sistem deventé rich?"
Savais’a che ntan che nëus son tlo dan la Cësa te verzon
Ai inò auzà la paga ai parlamentares de na milion,
bonamënter ie tlo ficeda ite nce la Union
ne é deguna proes, ma ntan… crion
La NASA à aposta metù a jì ch’sc instà ciaut
che l reste danter nëus, ne l dijëde massa adaut
per vënder plu “ghiaccioli” nce tlo alauta te Gherdëina
ntan che i tën ascundù n extraterest sota l Lech da Crespëina
Liejer ne me à mei plajù, de pensé sons do la rata stlet
Ma chël ie dut relatif, éi capì dal internet
Ajache la rë multimediela ie pu la lidëza nueva
la fontes? Pu dai, ne sarà pa tan muel
Sun internet sons duc acorc, duc possa crëier a cie che l uel.