CIE CONTA PA ÖTZI?
Gheneda ne al plu abù, da canche sun l dlacier l ai abinà...
zachei muessa avëi pensà: bon bon, leva mé śën, te es bën paussà.
Ötzi, per si zitadinanza Austria y Talia giut se à strità,
"viera danter i crëps" per n tel tipo dut sëch y nfraidumà,
jit ncantëur per si cont, curiëus de scuvrì l mond
y finà te na dlaciadoia a Bulsan, danter i cuntribunc dl Lond.
N vascel per Ötzi, zënza gheneda y danter la fuera di turisć de Bulsan
l brac de traviers che ti mustrëssa plu gën l dëit mesan dla man.
Tan bel fovel pa sun l Simulaun, ntlëuta nevovel mo y l fova tan chiet,
dan che na saieta ti à tëut la vita te n aiet,
ma la sfiga ne fova nia tan per Ötzi chëla de messëi murì,
ma plutosc chëla, che zachei l à pona scuvrì.
Da iló iela stata fineda cun la pesc danter studiei y archeologs
“La mort de Ötzi”: n cajo per l FBI y per i criminologs.
L à scumencià duta n’analisa, drët scientifica y avisa,
per capì Ötzi, si identità y si ravisa.
Do avëi udù ite do nrescides drët a puntin
che l ne fova no n ret, no n paleoladin,
an scumencià al taië su, per ti cialé mpue plu da daujin.
Nscila san chël che l maiova da marënda, cëina y gusté
dla bales da fuià jites de mel, che l à fat crepé.
N sà tant che l pesova, cie usc che l ova
y n ie monce unic sëura cie che Ötzi litova.
Tratà coche n prinz, coche n Tutankhamon dla dlacia
Ötzi, n scëmpl paster cun si cëura y si vacia.
I antropologs, cun si bisturi, à ulù l mëter sota i raies X, ch’sc paur,
plu che n sà y miec che l ie: knowledge is power.
I dij che i à monce udù ora sun si pel
ntan che i rafova sciche te na "Schweinshaxe" cun l curtel,
n tatuaje arcaich, vedliscimo de trueps ani
n tatuaje che dijova: “I love mami”.
Ötzi l prim VIP danter la elpes, sburdlà ju dal tron à ël Dolomieu,
nia mal per un che ulova mé se fé na raida a pe.
Ie ne cunësce nia Ötzi, ma do duc chisc ani che i studiei se à da da fé,
possi ie mé me mpensé, chël che l dijëssa, sce l ëssa da se descedé:
“Śën finëdla mé cun duc vosc vic y ac,
é sëit, fajëis miec a me purté n Vernatsch,
son mé n tel vedl che ne fej plu mel a deguni, che plu ne mord
y vo che me unies dant y do, monce canche vede de corp.
Do 26 ani jide vo scienziac, n iede per for, a chegé
y lascëdme, prëibel, n iede per for, finalmënter paussé!