DAMANDETI AL TËMP

​L zaperlé y l susté de n parpanticul stort
l se lamenté dl passà de n pianist cioch,
la catidles dl tenì danter la mans i sauc de n saioch
cialé mo n iede sun l’ëura y cumpedan l ultimo floch.
L tëmp valivea, ala fin fejel dut tarënt
l se sgravedea su danter la faudes dl linzuel durmient,
y te dà l bos dla bona nuet dut zënza sentimënt.
L tëmp se n frega y ne te dà resposta, canche ti damandes
l ne te pieta n’ombrula, ntan che sota ti legrimes te blandes.
L tëmp sa che dant o do unirà inò l bel tëmp,
ma per l tëmp ne ie dut chësc, nia ch’sc gran spavënt.
 
L tëmp se slongia ora sciche la Val de Chedul
canche te ies dan na dlavea... l’odla dla spriza iust dan ti cul
y te aspietes, śën, no śën mo nia, śën tosc unirà l pic,
l tëmp ie scentant tan lonch, canche te ies sun fëur, dut malatic.
Y pona te passel inò via te n aiet
canche te ies  dassëul cun ëila y te lasces rujené l chiet
y pona inò te n colp tan da stufé, ntan che te cumpëides la biesces tl liet.
Sota chël liet, ulache la polver te cijidea cie che ie l tëmp
n album cun pultredes smarides de ti rì inuzënt:
l tëmp ie n sté sun chegadoi, cialan tl uet dut assënt.
La zifula che te ne fumeres nia plu, che ti parënc scirmerà demez
l mans juntedes sun l vënter bel tamez
i gëura mo l viere lascian ite aria te majon
mo dan che i vën a te dé l’ultima benediscion.
Y ciom ciaudin, dl ultimo jufl dal got de ti pier,
te festididovesc dl duman, zënza se ntënder
de avëi bele perdù l “inier”.
Inier, canche dut, dijen for, fova plu bel y i vedli muferlova,
cun ch’la usc de chëi che dut miec savova:
“Tu! Te es pu mo duta la vita dan té!”
siche sce i ëssa cialà tla codla de cristal y ëssa pudù tl giuré.
 
Damandeti al tëmp cie che ël pënsa de nosc cumpedé
de duc chisc aniverseresc che ne dausson io nia se arjumé
per pona tla cësa de paussa sun n stuel da rodes,
mez nceurnii, cun na pistola al cë, l ultimo testamënt firmé.
L tëmp nes rij nia ora, chël ie l’aurità
de nëus desegur ne se mëinel picià,
l ti ie unfat sce sce te mazes de suà o sce te pausses sun l pra.
Na ciafita che cun uedli spanei  sute cëla y mpo ne te chega nianca
de ti cruzi, de ti ideai o de ti milions tla banca.
Ël, ël sà de avëi bele venciù y tu ch’sta partita posses al mascimo valivé
canche durmires zënza tëmp
y la biesces ne ares plu drë’ de cumpedé.